Samay soppe, sama nekk ak yeen dootul yàgg. Fama jëm, dungeen fa mana dem. Ñanu lékk réeru jéggi bu mujj bii laata ñu may sonal. Ndaxte maa ngi leen koy wax, dootuma ko lekk mukk, lu dul ba kera muy mat ci nguuru Yàlla. Noonu itam dootuma naan ndoxum réseñ mi, ba kera Yàlla di tëral nguuram.

Noonu mu jël mbuuru njoxleen ko ne: Lii sama yaram la, wi ma joxe ngir yeen. Defleen lii, ngir fàttaliku ma. Mu jël kaas ne leen: Lii moy misaal kóllëre gu bees gi Yàlla jaarale ko ci sama deret, ji tuuru ngir yeen. (2)

Demaa ware joxe sama dund ni ko yonent yi waxe woon. Doomu nit ki mu ngi dem, ni ñu ko waxe ci Mbind mi, waaye ki koy wór dina torox, bañoona juddu moo gënoon ci moom. Yeen ñépp taxuleen may wax; xam naa ñi ma tànn. Waaye li Mbind mi wax, fàww mu am bi mu naan: " Ki lell sama dugub wéq na ma ". Maa ngi leen koy wax ci teel, bala looloo ñëw, ngir bu ñëwee, ngeen gëm ne Maay ki Nekk. (3)

Àttan ngaa joxe sa bakkan ngir man?

Yeen ñépp dingeen ma dággeeki, ndaxte Mbind nañu: " Dina dóor sàmm bi, xari jur gi tasaaro'. (4)

Naam Baay bi yaw mi dare tëwul, teggil ma kaasu naqar bii. Moona bu mu doon sama coobare, waaye na sa coobare am. (5) Jeex na, waxtu wi jot na; ñu ngi wor Doomu nit ki ci loxoy bákkaarkat yi. Roofal sa jaasi ci mbaram, ndaxte ku bocci jaasi, jaasi moo lay rey. (6)

Ci fóon ngay jébbale Doomu nit ki ay noonam! Jóg ngeen, gànnaayoo ay jaasi ak ay yet, mel ni ñuy topp sàcc. Moona maa ngi woon ak yeen bés bu nekk ca kër Yàlla ga, te jáppuleen ma. Waaye léegi seen waxtu la, ak jamanoy lëndëm gi. (7)

Xana xamuloo ne, man naa laaj sama Baay te dina ma may ci taxawaay bi mboloom malaaka mu xel dajul? Léegi nag ndamu Doomu nit ki feeñ na, te ndamu Yàlla feeñ na itam ci moom. Te bu ma feeñale ndamu Yàlla, Yàlla itam ci teewaayam dina feeñal ndamu Doomu nit ki, te dina ko def léegi. (8)

ATTE BI AK BANT BI

Amuloo ben sañ-sañ ci man su dul bi la Yàlla jox. (1)

Lu tax nga may laaj? Laajal ñi doon déglu li ma leen wax. Ñoom xam nañu li ma doon wax. Ci mboolo laa doon waxe. Ci kër Yàlla ga ak ci ay jángu, fa yawut yépp di daje, laa mas di jangelee. Musuma wax dara di ko nëbb.

Suma waxee lu jaaduwul, wone ko; waaye su ma waxe lu jub lu tax nga may dóor. (2)

Sam kilifteef nekkul ci àddina. Bu sama kilifteef nekkoon àddina, sama surga yi dinañu xeex, bañ ñu jébbale ma. Sama kilifteef nekkul áddina.

Wax nga ko; buur la. Lii moo tax, ma juddo, ci ñëw àddina: Ngir wax dëg gi, ku bokk ci dëgg gi dina nangu li ma wax. (3)

Léegi ñu daq malaaka mu bon mi jiite àddina si. Te man, bu ñu ma yekketee, ma tiim suuf, dina woo nit ñëp ci man. (4)

Baay bi bëg na ma, ndaxte damay joxe sama bakkan ngir jëlaat ko. Kenn du ko jële ci man, man maa koy joxe ci sama coobarey bopp. Am naa it sañ-sañ joxe ko te am naa sañ-sañ jëlaat ko. Loolu la ma sama Baay sant. (5)

Baay, baal leen ndaxte xamuñu li ñuy def.

Eli, Eli, Lama Sabaktani; l iy tekki: Sama Yàlla, sama Yàlla, lu tax nga dëddu ma?

GANNAAW NDEKKITE LA

Yeen dal yeena ñakk xel, te sen xol yeexa gëm li yonent yi yégle woom! Xana du Krist di Almasi bi dafa waroon daj coono te dugg ci ndamam? Báyyil di weddi te nga gëm (1)

Bi ma nekkee ak yeen, waxoon naa leen baat yii: Li ñu mbind lépp ci samay mbir ci Yoonu Musaa ad téerey yonent yi ak ci Sabóor dafa wara am: Fáww Almasi bi sóon, mu dee te dekki ca ñetteelu fan ba, te it ñuy yégle yépp ci turam, dale ko ci Yérusalem, ne war nañoo tuub seeni bàkkaar, Yàlla baal leen. (2)

Xam naa fa ma bàyyikoo, xam fa ma jëm, waaye yeen xamuleen fa ma bàyyikoo ak fa ma jëm. Yeen, fii ngeen bawoo, ci suuf, waaye man ci kaw laa jóge. (3)

Ken mësula yéeg ci asamaan su dul ki fa jóge, muy Doomu nit ki. Demal te ne samay mbokk, maa ngi yéeg ca sama Baay biy seen Baay, ca sama Yàlla jiy seen Yàlla. (4)

Lu tax ngeen jaaxle, ak lu tax ngeen di xel ñaar ci seen xol?

Na jàmm wàcc ci yeen. Xolleen samay loxo ak samay tànk, laal leen ma te xam ne, man mii la; njuuma amul yaram walle ay yax, ni ngeen gise, ma am ko. Li nga mas gis a tax nga gëm? Ki bégg mooy ki gëm te gisus ma. (5)

Des na tuuti ci kanam , àddina du ma gisati; waaye yeen dingeen ma gis. Dina dund, moo tax yeen itam dingeen dund. (6)

BEES BU NEKK

Ni ma Baay bi yónnee, noonu la leen di yónne, man itam. (1)

Demleen nag sàkk ay taalibe ci xeet yépp, sóob leen ci ndox ci turu Baay ji, ak Doom ji, ak Xel mu sell mi. Demleen ci àddina sépp, yégal xebaar bu baax bi mbindeef yépp. Ku gëm te ñu sóob ko ci dox, dina mucc; ku gëmul, dees na ko daan. (2)

Buleen sore, waaye ngen xaar li Baay dige woon, te ma waxoon leen ko. Yaxya ci boppam moom daa sóob nit ñi ci dox, waaye yeen, dees na leen sóob ci Xel mu Sell mi fi ak ay fan yu néew. (3)

Bu Xel mu Sell mi ñëwee ci yeen, dingeen jot káttan, te nekk samay seede ci dëkku Yérusalem, ca diiwanu Yude ak Samari Yépp, ak ba fa àddina yem. Sol naa leen Xellu Yàlla mu Sell mi. (4)

Jàngal leen xeet yi ñu sàmm lépp li ma leen sant; te fáttalikuleen ma ngi ak yeen bés bu nekk, ba kera àddina di tukki.